Studio Caribe (Papiamentu)
Studio Caribe ta enfoká riba desaroyo i realisashon di pelíkula (hubenil) kòrtiku di e kreadónan di e parti karibense di Reino Hulandes. Den e kaso akí, ta trata di e plannan sinematográfiko den e kategorianan di fikshon, dokumental, sine eksperimental (mín. 5 i máks. 30 min) òf animashon (min. 1 minüt).
Ku e Areglo di Tayer akí, Fondo Sinematográfiko ta ofresé e kreadónan di Aruba, Boneiru, Kòrsou, Saba, Sint Eustatius òf Sint Maarten espasio pa nan desaroyá nan talentonan ainda mas i asina kontribuí na enrikesimentu di e oferta sinematográfiko di historia original di i riba e islanan.
Pa Studio Caribe, ta selekshoná 12 proyekto pa e fase di desaroyo. Ademas di e kontribushon di desaroyo, e kreadónan selekshoná ta risibí coaching i training, i nan ta asistí na workshop pa desaroyá nan plan sinematográfiko den e kategorianan di fikshon, dokumental òf sine eksperimental.
Di e 12 proyektonan desaroyá, ta selekshoná despues 6 proyekto ku lo keda realisá komo pelikula kòrtiku.
Bo ta deseá di hasi un petishon pa Studio Caribe? Durante e Festival Internashonal di Sine di Kòrsou, ku ta tuma lugá entre 10 i 14 di aprel 2024, nos ta organisa vários reunion tokante kon hasi un petishon na e Fondo Sinematográfiko i skirbimentu di un plan di sinematográfiko. Bo tin pregunta? Durante e orario di konsulta di Studio Caribe na Kòrsou, Aruba i online, nos ta duna mas informashon tokante e areglo. Pronto lo tin mas informashon tokante esaki.
*Denter di un Areglo di Tayer, ademas di un kontribushon, e kreadónan selekshoná ta haña espasio pa desaroyá un pelíkula kòrtiku den un trayekto speshalmente diseñá den kolaborashon ku entrenadó òf otro eksperto.
E areglo ta enfoká riba guionista, direktor i produktor di Aruba, Kòrsou, Sint Maarten, Boneiru, Saba i Sint Eustatius, ku tin un idea sinematográfiko original pa desaroyo di un pelíkula (hubenil) kòrtiku.
Guionista i / òf direktor (eskritor) ku a biba i traha un aña òf mas na Aruba, Boneiru, Kòrsou, Saba, Sint Eustatius òf Sint Maarten, i tin un idea sinematográfiko original, por hasi un petishon pa desaroyo pa Studio Caribe. Por hasi esaki ku òf sin un produktor. Un produktor tambe por hasi un petishon. Durante e trayekto di desaroyo, e kreadónan ku no tin un produktor lo risibí sosten pa haña un produktor.
Bo por entregá un máksimo di dos plan pa persona.
Den kaso di un petishon di realisashon, esei sí lo mester keda entregá pa un produktor.
Komo guionista, direktor (eskritor) òf produktor, bo mester tin algun eksperensia demostrabel den e sektor oudiovisual, industria kreativo, teater, literatura i / òf arte visual.
Mira Kondishon pa mas informashon.
Por hasi petishon di e siguiente kontribushonnan pa Studio Caribe:
Desaroyo
- Máksimo € 10.000,-- pa proyekto (€ 8.500 pa e kreadó), € 1.500 pa e produktor)
Bo ta uza e kontribushon akí pa e plan sinematográfiko. Bo ta desaroyá e plan sinematográfiko den un treatment òf scenario pa un produkshon sinematográfiko original i independiente di por lo ménos 5 minüt i un máksimo di 30 minüt (fikshon, dokumental, sine eksperimental) òf por lo ménos 1 minüt (animashon).
Si bo keda selekshoná pa desaroyo, bo ta partisipá den e trayekto di workshop di Studio Caribe. Aki bo ta haña coaching, training, i bo ta partisipá na workshop. E trayekto ta ofresé bo e hèrmèntnan nesesario pa bo kuminsá traha riba bo pelíkula kòrtiku, i, si bo no tin un ainda, ta buska un produktor adekuá pa bo proyekto.
Bo tin un produktor, pero esaki no tin asina tantu eksperensia ainda? Si bo idea sinematográfiko keda selekshoná, un produktor eksperto ta ofrese coaching ku e produkshon durante e trayekto di Studio Caribe.
Realisashon
Si bo proyekto, despues di su desaroyo, keda selekshoná tambe pa realisashon:
- Máksimo € 65.000, - inkluyendo un máksimo di 15% di e tarifa di produktor i e gastunan general
Den kaso di selekshon pa realisashon, por uza 5% di e kontribushon di realisashon pa un desaroyo mas grandi di bo proyekto. Bo por uza sobrá di e kontribushon pa produkshon di e pelíkula kòrtiku.
Komo solisitante pa Studio Caribe, bo ta kumpli ku e siguiente kondishonnan:
- Na momentu di hasi e petishon, bo ta biba i traha na Aruba, Boneiru, Kòrsou, Saba, Sint Eustatius òf Sint Maarten ya pa mas ku un aña.
- Komo guionista òf direktor (eskritor) òf produktor, bo mester por laga mira trabou ku ya bo a hasi. Esei ta nifiká ku bo tin por lo ménos:
- 1 obra oudiovisual liber (es desir, 1 produkshon sinematográfiko no enkargá);
- òf 2 obra oudiovisual komersial, enkargá pa 2 kliente diferente. Pensa riba: anunsio komersial, vidio musikal, pelíkula korporativo i otro trabou sinematográfiko enkargá;
- òf por lo ménos un obra teatral presentá / palabra papiá / obra di radio;
- òf por lo ménos un historia di fikshon publiká i / òf un buki / poesia / podcast;
- òf por lo ménos un obra di arte oudiovisual realisá;
Den kualke kaso, un petishon pa Studio Caribe mester kumpli ku e siguiente kondishonnan:
- Mester por realisá e idea sinematográfiko entregá riba e islanan ku mas tantu talento lokal posibel.
- E pelíkula ku ta desaroyá (fikshon, dokumental, eksperimental) tin un durashon mínimo di 5 minüt i máksimo di 30 minüt.
- Un pelíkula di animashon ta dura por lo ménos 1 minüt.
- Mester por desaroyá i realisá e pelíkula kòrtiku nobo denter di e kontribushon i e tempu ku e Fondo a pone disponibel.
- Ta permití finansiamentu adishonal te na un máksimo di 10% di e presupuesto di produkshon;
- Despues di selekshon pa realisashon, ta realisá i entregá e pelíkula denter di un aña.
- Ta entregá e petishon na hulandes, ingles, papiamentu òf papiamento.
Ora nos ta hasi evaluashon, nos ta wak prinsipalmente si bo tin un plan sinematográfiko kla i atraktivo, ku un historia original, urgente i outéntiko, i ku tin su rais riba un di e islanan. Pa mas informashon, mira e preguntanan frekuente (FAQ’s) na final di e página akí.
Djamars 21 di mei 2024 12:00 or GMT-4 (riba e islanan) òf 17:00 CET (ora Hulandes).
Un máksimo di 12 plan sinematográfiko ta bini na remarke pa un kontribushon di desaroyo. Di esakinan, un máksimo di 6 plan sinematográfiko ta bini na remarke pa un kontribushon di realisashon.
Un komishon komponé ku ta konsistí di representante di e parti karibense di Reino lo evaluá e petishon. Ta konsiderá e petishonnan integralmente pa yega na un selekshon final den kua ta buska un distribushon riba e islanan i un komposishon diverso di kreadó. *
E direktor / gerente di e Fondo Sinematográfiko ta disidí riba e petishon.**
Bo a risibí sí un kontribushon di desaroyo pa Studio Caribe, pero bo proyekto no a keda selekshoná pa un kontribushon di realisashon? E ora ei semper bo por wak si bo por manda e plan sinematográfiko na un di e otro areglonan di e Fondo Sinematográfiko.
* Bo por haña e puntonan ku ta tuma na konsiderashon pa evaluashon den artíkel 5 di e Reglamento General (Dutch).
** E direktor / gerente ta tuma e desishon final. Bo por haña e puntonan akí den artíkel 3 di e Reglamento General (Dutch).
Na bo petishon, bo ta agregá e siguiente aneksonan:
- Un plan sinematográfiko (máks. un página A4), inkluyendo título, logline i sinópsis. Wak e preguntanan frekuente (FAQs) akibou pa mas informashon tokante un plan sinematográfiko.
- Un deskripshon kòrtiku (máks. un página A4): Kiko bo a yega di traha, i kiko bo ke traha (den futuro)?
- Si bo ke konta mas tokante bo mes komo kreadó i bo plan sinematográfiko den un vidio? E ora ei bo por manda nos un vidio di máksimo 3 minüt. Esaki no ta obligatorio.
- CV di e solisitante (máksimo 1 página A4).
- Manda un ehèmpel di bo trabou(nan) anterior. Wak e kondishonnan pa ehèmpel. Sin trailer, kompilashon òf showreels.
- Tin algun kliente òf produktor ku bo a yega di traha kuné anteriormente ku lo ke bisa algu tokante esaki (máks. 1 página A4 pa persona).
* Atenshon: E vidio mester keda disponibel pa por lo ménos 6 luna via e link ku a duná.
You can apply for Studio Caribe from 15 April 2024.
Por hasi petishon pa medio di e vershon digital di e formulario di petishon huntu ku e aneksonan via Frame. Bo petishon ta bálido si bo aseptá nos kondishonnan den e formulario. No ta nesesario mas pa download e formulario i manda esaki firmá pa nos. Lo tuma na konsiderashon solamente e petishonnan kompleto. Uza e lista di verifikashon akí (checklist) promé ku bo manda bo petishon, di manera ku bo ta sigur ku lo tuma esaki na konsiderashon.
Kuminsá ku e petishon
Pa manda e petishon digital, bo ta login den Frame. Si ainda bo no tin e datonan di login, pidi un kuenta nobo promé. Pidi un kuenta nobo aki. Tene kuenta ku esaki por tuma dos dia di trabou. Bo a risibí e datonan di login? Kuminsá ku bo petishon e ora ei via e boton akibou i sigui e pasonan akí:
- Selekshoná e kuenta pa medio di kua bo ke hasi bo petishon.
- Klek riba Filmactiviteiten - Studio Carib.
Pregunta frekuente (FAQ’s)
Un plan sinematográfiko ta kuminsá masha chikí den e fase di desaroyo, por ehèmpel, ku solamente un idea pa bo pelíkula, un logline, algun potrèt pa un impreshon sinematográfiko (pensa: 400 palabra òf 3 minüt di vidio), i e ta krese den desaroyo te bira un plan grandi den kua bo vishon di direktor ta aparesé, e treatment òf scenario, bo moodboard i un animatic. Bo plan sinematográfiko ta krese ainda mas di manera ku eventualmente bo por yega na e fase di realisashon, i tur hende, for di e ekipo riba e sèt te ku e editor den posprodukshon, lo sa ki tipo di pelíkula boso ta trahando riba dje, i ki plan ta tras di esaki. Esaki ta e plan ku por realisá bo idea sinematográfiko.
Un pelíkula di fikshon, pelíkula di animashon, eksperimentu sinematográfiko (fílmiko) òf dokumental te 30 minüt. Anunsio komersial, vidio musikal, TikTok òf InstaStory tambe por tin un durashon kòrtiku, pero no ta konsiderá nan "short films"."Na promé lugá, nos no ta mira nan komo pelíkula independiente, pasobra hopi biaha, nan ta trahá riba enkargo, i nan tin un propósito spesífiko (anunsio komersial, vidio musikal). Bo por manda nan aden si esei ta relevante pa mustra loke bo por i loke bo a hasi den pasado. Tambe ta importante: E Fondo Sinematográfiko no ta sostené anunsio komersial, vidio musikal, TikTok òf InstaStory, pero solamente pelíkula (kòrtiku) ku tin potensial pa keda presentá den sine, riba e servisionan di televishon/transmishon, festival, etc.
Ku "kla i atraktivo" nos ke bisa ku bo mester perkurá pa bo plan sinematográfiko ta fásil pa lesa pa un persona ku no konosé bo, di manera ku e lesadó òf miradó ei no tin ku adiviná òf buska pa haña sa di kiko bo pelíkula ta trata. Imaginá bo ku bo ta skirbi pa un stranhero amigabel, ku bo ta laga sera konosí ku e mundu ku bo tin na bista den bo pelíkula. Perkurá, pues, tambe pa un tipo di lèter bon legibel i, por ehèmpel, pa potrèt kla.
Ku "original, outéntiko i urgente" nos ke bisa ku e plan sinematográfiko mester ta bo idea (original), ku e historia ta kreibel i ku ta kreibel ku ta abo ta kont’é i ku bo bos ta zona den dje (outéntiko), i ku tin un motibu pa konta e historia akí na e momentu akí (urgente). Por tin vários motibu ku bo plan sinematográfiko ta original, outéntiko i urgente, motibu ku ta relashoná ku bo, pero tambe motibu ku ta relashoná ku e mundu rònt di bo: esakinan ta e kriterionan di evaluashon ku Fondo Sinematográfiko ta uza, pero no ta e intenshon pa nan abibá e kandela di bo 'krítiko interno'.
Persona di kontakto:
Esther Aboagye Afriyie
Projectbegeleider
